رساله من الباش 3 / 9 جديـــــــــــــــــــــــــــد

اول شي انا مالى مصدق شو عملتو وشو عم تعملو رح الكن شو عملتو :

1- انا كنت مفكر انو بعد ما خلصت الاكاديمى وكل واحد رجع على بيتو ولاهلو وصحابو انو اكيد الناس رح تنسى مين هاد باش
لان انا لفترة كتير صغيرة نسيت مين انا .. بس ياللى صار انو ماعاد صدقت شو عم بيصير .. رجعتولى الضحكة .. فرحتونى من كل قلبى .. خليتونى عن جد هالمره انسى مين انا .. بأكتر وقت انا بحاجة فيه لالكن كنتو معى واكتر من ما انا كنت بتصور .. بصراحة انا بحسد حالى كرمال فى ناس عم توقف جنبى وعم تدعمنى من دون مااعرف ليش وكيف ...

2- انا ولا ممكن انسى اى حدا دعمنى ووقف جنبى ولو بحرف او حتى من دون مايقول اى حرف .. وبنفس الوقت فينى انسى انو فى ناس غلطت بحقى او بعدا عم تغلط .. انا ماعم قول هيك لارجى الناس انى متواضع او انى كتير ظريف وشوفونى ما احلانى وبليز حبونى .. سورى عم بحكى بهاى الطريقة بس انا معتبر حالى انى عم بحكى مع حالى وانو مافى حدا عم يسمعنى او عم بيعلق على ياللى عم بكتبو ... انا محمد باش ولا ممكن اتغير ولا ممكن شوف حالى او جرب زعل او اجرح مين وقف جنبى وفكر يدعمنى بيوم من الايام ... حتى لو على حساب مصلحتى ...

3- انا مابدى حدا يفكر انى زعلان او مضايق من شى محبتكن لالى بتسوى الدنيا كلها وانا مبسوط فيكن متل ما انتو مبسوطين فينى وهاد كل همى والله ... ماعاد حلمى كون ستار قد ماحلمى انى ضل معكن للاخر متل ما انتو معى من الاول للاخر ...

4- بدى ارجع قول انو جد ما بتتخيلو قديش انا بكون مبسوط لما شوفكن مبسوطين ومرتاحين وهاد صار شى من كتير اشيا عم بشتغل عليها ...

5- بعرف انى مقصر بكتير شغلات .. بعرف انو لازم خبر عن كل شى عم بعملو وعن كل شى عم حضرو وعن كل سفرة عم سافرها وعن كل اغنية عم بكتبها وعن كل قصة عم بتصير معى لازم .. لانكن متل اهلى وواجب عليا انى طمنكن عنى وعيشكن كل لحظة معى قد مافينى .. وجربت التويتر (Twitter) بس بكل صراحة والله ما حبيتو كتير ثقيل هاد سبب كتير بسيط وسورى كتير انو هيك صار ....

6- بخصوص موبايلى ياللى مسكرو صارلى اكتر من ما بعرف قديش 3 اسابيع او اكتر .. اقسم انى كنت كتير مبسوط عم بحكى مع الكل وعم بسمع الكل بس جد ما كنت اقدر افتحوا الا ساعة او ساعتين باليوم وكتير ناس تزعل منى ليش ماعم ترد علينا وليش ما عم تشوف الرسايل .. والله لو فينى افتح موبايلى طول اليوم ورد على كل الاتصالات وجاوب على كل الاسئلة كنت عملتها وانا مبسوط ومرتاح .. بس قد ماعملت مستحيل انى ارضى الكل ...

7- انا من وقت ماطلعت من الاكاديمى وانا مقرر انى افتح موقع رسمى خاص فينى انا بديرو وانا بكتب كل حرف فيه وتحت اشرافى كرمال كل كلمة بقولها فى الموقع انا بكون مسئول عنها وكل خبر انا بكون مسئول عنو وكل موضوع بينحكى فيه انا بكون موافق عليه ... بعدنى عم بشتغل على هاد الاساس وانشالله مو كتير مطول لحتى نكون كلنا موجودين بموقع واحد بيحمل اسمكن قبل اسمى وبيكون تحت خدمتكن قبل مايكون بخدمتى انشالله عن قريب كتير كتير ....

8- شى كتير مهم ... انا متلى متلكن مو كل شى بشوفو ولا كل موضوع بصدق شو عم ينحكى فيه ... بتفاجئ بكتير قصص متل ما انتو بتتفاجئو ... كتير بيوصلونى رسايل على (inbox) تبعى بستحى الكن شو مكتوب فيها بس لما شوفها بضحك من كل قلبى .. بس بنفس الوقت ولا مره وحتى بينى وبين حالى قلت انى بكره حدن من كل طلاب ستار اكاديمى ياللى عشنا مع بعض واكلنا وشربنا بنفس البيت لوقت كتير طويل .. انا بستغرب من كل شى عم بيصير .. انا بطلب من كل كل ياللى بيحبو محمد باش وكل ياللى بيكرهوه وحتى فى ناس ما بتعرف عن شو عم بحكى .. بطلب من الكل اذا فى مشاكل متل ماعم بيقولو بيناتنا فانا بترجى الكل اعملو متل ما انا دايما بعمل .. ولا كأنى شفت شى او سمعت شى ومتل مافى ناس محترمة مثل ما فى ناس بكره بتصير محترمة فعادى بليز ما حدا يغلط مع حدا حتى لو فى ناس عم تغلط فينى فأنا قبلان اتحمل هاد الشي وبليز ما تدخلو حالكن بقصص كلنا بغنى عنها وبليز لكل ياللى بيحبو باش بليز انا بترجاكن كأنو ولا حدا حكى بليز ....

9- بدى ارجع قول شكرا لكل مين عم يدعم باش ... وبدى ذكر الكل انا كتير مرتاح ومبسوط وصحتى بألف خير وعم بشتغل على كتير قصص حلوة رح تنبسطو فيها بس تحملونى كرمال كل شي يكون ظابط طولت عليكن وسورى كتير ما عم اكتب بالانجلش كرمال ما بعرف عبر كتير بالانجلش وبخربط كتير ويمكن فى ناس رح تتعذب وما تعرف تقرا شو كتبت ... فى كل حال انا كتير انبسطت حكيت بكتير اشيا كان من زمان لازم احكى فيها ... عن جد انا مبسوط كتبت كل شى من قلبى وانشالله دايما ضل هيك وانتو احلى اهل بالعالم ....
بتجننو .. وصباح الخير يا باشويين
بحبكن